之前一直有個idea，就係幫自己設計一個屬於自己，又代表到自己既公仔！今日終於成功設計左，大家覺得點？........(其實無乜心機整！ )
我同佢改左果名，佢叫做"Leonard"，中文叫"倫納德"，當然係男仔黎啦，"Leonard"有個含義就係"壯如獅子"咁解！
講下"Leonard"點解會代表到自己！
頭髮：呢個髮型跟本就係我既特徵黎，而且係七彩顏色，即係話我個人比較開朗，鍾意生活多姿多彩；
身形：一睇到圓"dum dur"既身形，就知代表我肥啦；
膚色：係好似"鐵、鋼"果種既顏色，呢隻顏色比人既感覺係好"高科技"、"High Tec"既feelings，即係我好鍾意一D高科技既野，緊貼潮流既尖端；
包住個口果塊布：因為有好多人話唔識我果時覺得我好cool，所以用黑色布。另外點解包住個口呢？因為通常我唔會主動同唔識既人打開話題，人地同我傾計先會開口同人傾；
眼：本身我隻眼唔係咁大既，但點解隻眼整到大大隻呢？係因為我想將我自己既眼光放遠D，想周圍去，見識多D；
手：隻手咁細又唔代表我本身隻手細喎，係因為我覺得自己唔係一個好幫手，人地叫我做野，我未必幫到手，可能越幫越忙，係個缺點黎；
腳：隻腳就大過隻手，因為我隻腳本身都算大，而且隻腳係oval shape，即係話我做野要比人推一推先郁幾下，唔係好似圓形咁，一推就不斷順住去轉，係咁郁。
其他：個光環同果條魔鬼既尾巴，係代表我自己既性格，我自己有好多好既性格，例如：鍾意幫人，會做下善事等........但亦有好多唔好既野，例如：有D自私、有雙重既性格等！有時仲因為唔知點解明明自己係有善心既，但當人地叫我幫手去做善事，就會推左佢，好似有種阻力阻止我去做善事咁。所以我都算係天使同魔鬼既化身，哈！
[ 本帖最後由 冰•Leo 於 08-7-26 15:04 編輯 ] |